انتي على وجة خطوبة..! انتي مخطوبة..! سوف تتزوجين..!

[خطير الملامح]

السلام عليكم جميعاً

جبت لكم موضوع انشالله يعجبكم

منقــــــــــــــــــــــــــــــــول للفائده

================================

اكيد فيه شاب بيخطبك...وطبعا الاهل اذا سألو عنه وتأكدو من صلاحيته ومناسبته لك ..واخلاقياته وطباعه ودينه ووضعه المادي والوظيفي..ذيك الساعه ..بتتم الموافقه المبدئيه..وبيدعونه اهلك ..عشان تشوفون بعض..واللي يسمونها ( النظره الشرعيه) عاد النظره الشرعيه وانا اختك..يعني كوني كما انتي..بس موب تدخلين عليه وانتي كنك توك طالعه من المطبخ...
انما البسي تنوره وتي شيرت ناعمين..وفكي شعرك وصلحيه كأنك بتطلعين لمناسبه..وحطي ماسكرا..وقلوس على الشفايف..وشوي بلاشرعلى خديداك..وبس...كأنك رايحه الكليه.. يعني اشراقه فقط لاغير..

وبلها تدخلين بالبخور..مدري بالعصير...بلا خرابيط..انتي ناقصه ربكه
وبعدين دخان البخور بتغبش عليه وعليك ..ادخلي بكل ثقه....فارده طولك...وانتبهي تجلسين روحك بآخر قرنه من المجلس..بزعمك حياء..صدقيني..هذا موب حيا..هذا قلة حيا
الا الرجال بيشك ويقول ذي فيها بلا متوزيه عني فيذاك عشان ما اشوف عيبها

الا اجلسي في الكنبه اللي جنبه (بس لا تلزقين)...وخلي وجهك مقابل وجهه. .وموب تقعدين ثانيتين وتنقزين..كنك مقروصه...هذا صار حلم موب شوفه .اقل شيء ربع ساعه...واتكلمي (كلمات بسيطة مو دق حنك) وارفعي وجهك..شوفيه زين وخليه يشوفك زين...بادليه الكلام والاسئله..لا تقعدين كنه يمتحنك شفهي ..مغير تجاوبين وبس...اسئليه عن شغله وطبيعته..كم ساعات دوامه...ووش طموحه...يعني..خللي الكلام بينكم فيه نديه..عشان ياخذ انطباع عن شخصيك انها قويه..وحركه..وانك فاهمه وحيويه
بعدها عاد استأذني وقومي وادخلي جوا بيتكم راشده

بعد ما يتم النصيب...وتتم الموافقه...وتصيرين مخطوبه رسميا لهالشاب...بدا الهرج الصحيح..وراح هرج المزوحي

اول شيء لازم تكون فترة الخطبه كافيه للتعارف عن كثب على بعض..وكلما طالت كان احسن


الخطوبه:لتنبيه(البعض مايعترف بفترة الخطوبة
====================

في فترة الخطبه..اتبعي هالنقاط متتاليه:
اولا..اياكي ان تعتبري هالفتره فترة حب وتدخليها اولريدي عاشقه..هذا اكبر خطأ قد ترتكبينه..انماادخليها على اساس اني ابي اعرف هالرجل زين..وعلى اساسه اكمل مشروع زواجي..او اوقفه..يعني اركني قلبك على جنب..وحكمي عقلك...لا تتصرفين كمراهقه حمقاء ولا كانسانه ماصدقت على الله لقت رجال

ثانيا: الوضوح والصراحه..والكلمه اللي تستحين منها بديها..اخبريه بكل عيوبك..حتى لو فيك عيب جسماني..مثلا فلقه صغنونه في جبهتك ..ولا شامه كبيره داخل جسمك..ولا ثعلبه في شعرك من وراء ولاهي باينه.. ولا اية شيء ما شافه...خلي يحس بصدقك ووضوحك لان الصدق والوضوح يخلق الاحترام.بين الطرفين ..
واخبريه بعيوبك الانسانيه..وطبعا قولي له اني بحاول اتلافى هالعيوب..بس لو ماقدرت ذنبك على جنبك..وهذانا تونا على البر
واطلبي منه يخبرك بكل عيوبه..بدون وجل او حياء..لانك ماراح تعذرينه لو خبا عليك شيء واكتشفتيه بعدين
اما مزاياكم الاثنين..فاتركوها لبعض تكتشفونها تلقائيا..واظن شيء بايخ ان الانسان يقعد يثني على روحه

ثالثا: لا تميليحين..او تدلعين اوفر...او تزينين صوك ..على بالك تغرينه. .بالعكس..خليه يسمع صوك بكل حالاك..وانتي تضحكين وانتي زعلانه وانتي جاده..وانتي بعد تتدلعين على خفيف ...
ولا تدعيّن الطعامه وخفة الروح والوداعه ..اذا مودك هذاك اليوم مو مضبوط...يعني تلاقيك متخانقه مع اخوانك وبس دق عليك..فكيتي لوية البوز وقعدتي تكركرين وتلاقيك مالك خلق..بس عشان ودك يشوفك بأحسن حالاتك..هذا غلط ..لو مزاجك متعكر ودقّ عليك..بعد ما تكلمينه شوي اعتذري منه وقولي مزاجي اليوم مهوب زين ولابي اخرب جوك..ولالي رغبه في السواليف...عشان يعرف انك بشر..يوم حلو ويوم مر..وما يقعد بعد الزواج يعايرك ويقول: وش فيك تغيرتي ولعاد تضحكين وتدلعين علي زي اول ولاعاد تسولفين..الله يالدنيا..ومغير يجمع عليك شرهات واغلاط....
حلو انه يعيش معك شخصيتك الحقيقيه من البدايه بدون زخرفه ولا زباريق.ولا اقنعه غبيه .ولا ادعاء وتجمل كاذب

رابعا: ابدي من اول ماتنخطبين..بالدخول في برنامج العروس..اللي بتلاقينه في اكثر المشاغل او مراكز التجميل المتخصصه..وهم بيحورفون فيك..وبشعرك ووبشرك وبجسمك..عشان الين جا يوم العرس لاك زبده. .تلقّين..في قمة نضارتك وألقك...واصحي تعبثين بروحك بخلطات طبيعيه مدري وشو..مغير طماله ولغوصه وتعب..من غير نتايج فعاّله....
.وخوذي فيتامينات..وكثري من شرب المويه واكل الخضروات والفاكهه..واذا كنتي تميلين للامتلاء..اتبعي ريجيم بس موب حاد...وامشي..كل يوم..واذا تقدرين ادخلي نادي رياضي..او انتي سوي لروحك جدول يومي تسوين رياضه لمدة ربع ساعه يوميا...

بعد ما تتعرفون على بعض زين..وتحسين فعلا انه هذا هو اللي تبين ترتبطين فيه...وهو كذلك..تحددون الملكه...وتتملكون ..وياليت تكون فترة الملكه قصيره..تسبق الزواج باسبوعين تقريبا مو اكثر...

الملكه:
====================

الحين صرتي مرته على سنة الله ورسوله..وفعلا هذي هي اصعب مرحله..ولاعاد فيه فكه..الا اذا صار شيء كايد لاسمح الله

لكن تبين نصحيتي من مشاهداتي ومسموعاتي ...اياني وياك تطلعين معاه عمال على بطال بزعم انك حرمتي حلالي...ولا يلعب عليك بقولة نختار الاثاث ...الله واكبر الحين وشذا الاثاث؟ ..الحين اللي يسمعه يقول بيأثث قصر اليمامه
. راس مالها شقه منتكه..وكنبتين وطاولتين..وكم مسنده على كم ستاره...على غرفة نوم...
انا انصحك تقولين له..انا ابيك تأثث بيتنا على ذوقك وابعتبرها هديه منك لي...لان الشقه مرحله اولى بحياتكم..وخلي ذوقك للبيت الحقيقي وبيت عمركم الملك...او شقه اكبر او فيللا.في المستقبل...انما هذي خليها عليه..وعساك تلحقين على جهازك...وملابسك..واغراضك..اللي لها اول مالها تالي..وحورفك في خشك...اللي يبي لها راسن صحيح
وان لزمّ روحي معه لاختيار غرفة النوم بس..ولازم معاك اخوك الصغير..او ولد اخك او ولد اخوك..المهم لاتروحين لحالكم..ادري بيتقولين هماه رجلي. .بس صدقيني..لا تعرضين نفسك لتجربه قد تندمين عليها
لانك ماتضمنينه..لاني اعرف بنات تساهلو بطلعات الملكه..وخربو فرحة اللقاء الاول يوم الزواج ( وشفقة) الرجال عليهم..وصار يوم الزواج عادي..مافيه فرحة اللقاء وشوقه..اضافه الى ان فيه بنات اعرسو وحملو واعرسو وهم يتنسونّ ..وتجيك الوحده في زفتها صفراء...وعيونها تغربّ... صدقوني..قاومي كل الحاحاته..بالرفض التام..وقولي : المفروض تعذرني لاني اول مره اطلع مع واحد غير ابوي واخواني...ولاني جاسره عند اهلي اطلع معاك بروحنا مهما صار
صدقيني..بيعرف ان شخصيتك قويه واذا قلتي شيء ما تتراجعين فيه..وبيزيد شفقته عليك..وشوقه لك...


يتبع

[خطير الملامح]

.يوم الزواج:
===================

نامي زين....واكلي زين..موب عشانك شايله هم الليله..تنسد نفسك عن الاكل..وموب شرط تاكلين وجبات كامله..المهم كل شوي كلي شي..عشان ماتجوعين..وتتوترين اكثر..وعشان تبانين في ليلة عمرك بكامل نضارتك واشراقك وهدوءك النفسي
طبعا الزفه هي اهم شيء في الزواج..ونصيحتي اذا زوجك وده ينزف عليك..فبها ونعم..اما اذا كان رافض فلا تحاولين تجبرينه...ولا تحاولين تتذاكين وتقولين بيوم الزواج بأحطه قدام الامر الواقع وتخلين ابوك واخوانك يهضلون عليه ويجبرونه غصب ...لانه ماراح ينسى لك ولاهلك مسألة اجبارهم له..هذا من جهه...وكمان دخوله وهو ما استعد نفسيا ولا اتهيأ..ممكن يسبب احراج له في بعض حركاته وتصرفاته..وهو معاك على الكوشه..وبيبان شكله متنشن اوي اوي. ..وانا بصراحه اعرف المغصوب على الزفه من كثر قولبة راسه وتمسيس رقبته..وتنفيضه لمشلحه .وبحلته بايدينه .فاتفقي معاه على هالوضع من بدري وحددي موقفه..وعليه رتبي حالك..

بعدها عاد بتطلعون وبتركبون السياره....وطبعا هو بيصير مستانس.وبيحاول يضفي جو من الالفه ..واسقاط الكلفه بينكم...فجاريه في وناسته..وعبري عن شعورك بالفرح..والارتياح..وبادليه المزح والكلام..لا تظنين او تحسسينه انه هو المسؤول عن ادارة هالليله لوحده

الليله الاولى:
====================

بعد ماتروحون الاوتيل..وتبدلين ملابسك..انصحك بلبس قميص محتشم..طويل...وبصراحه انصح كل عروسه يكون اسبوعها الاول بقمصان نوم تميل للاحتشام..ترى الرجل يظل يحترم في المرأه حياؤها..ومهما بلغ الرجل من تحضر او تفتح ذهن...يرضي غروره الذكوري ان المرأه تستحي منه...اضافه الى انه يحس بالاطمئنان لزوجته..اذا شافها على هالشكل...وحلو الشيء يجي بالتدريج..يصير اطعم واذوق ..ولاحقه على الشخلعه..والبيبي دول واللزي منووو

وعموما..الليله الاولى تكون كلها تعب وارهاق..فألأفضل انها تمر ( بسلام) وينام كل من الطرفين عشان يرتاحون..ولاحقين خير..
طبعا موب قاعده..ان كل كبل..يسوون التصرف ذاته...لانه يعتمد على الطرفين..واستعدادهم النفسي والجسدي ورغبتهم...ومدى انسجامهم...

شهر العسل
========================

اجمل فترة في الزواج هي شهر العسل..فاجمل شيء تتفقون وترتبون انكم تقضون شهر عسلكم ببلد تحبونه او ودك تروحين له..بس هو لازم يكون راح له قبل...وعارفه..يكون طبعا افضل واريح له ولك.ولتلافي بعض الاحراجات اللي ممكن تحدث.

في هالشهر..عيشي قصة حب جميله..وجربي المشاعر لأول مره وتلذذي بالاحساس بها لاول مره..واطلبي منه اية شيء بخاطرك..لان الرجل في شهر العسل يكون في احسن حالاته وحبوّب ويعاملك بحنيه مالها مثيل..فعاد استغلي الفرصه ودلعي روحك وطربي عمرك ..ومارسي اشياء حاطتها في بالك..ووثقيّها بالصور و بكميرا الفيديو..عشان تبقى ذكرى حلوه لك ولعيالك بعدين..

.وانتبهي من الغيره الغبيه...وكأنك تختبرين زوجك...وحاطه عينك وحواسك عليه ...لا يلتفت ولا يطالع ..بالعكس..الين شفتيه يطالع..خليه..الا اذا شفتي وحده حلوه..قولي له: شف هذي وش حلوها؟ ولا وش رايك موب حلوه؟ خليه يحس بثقتك بروحك...وانك منتي معقده ولا تحسين بنقص... ..خليه يحس انك صديقه له موب زوجه غيوره تقليديه ...

جربي كل شيء بنفسك.. .حتى لو ودك تركبين منطاد اركبيه. ..خلّي هالفتره ماتنسّي بذكرياتها مهما صار

اسلوب الحياة كيف يكون ؟
======================================

عموما...اهم شيء العفويه..خلوكم على طبيعتكم.خاصه في علاقتكم الحميميه .واتصرفو بتلقائيه في هالامور..لان هالامور بالذات اذا رتب لها واتعمدت ترسم لها سيناريو معين..تصير ثقيلة دم وماصخه..وفاشله بعد...
لان وحده تقول لي عن خالها متزوج له سنين..تقول انه يقول الين سريت يوم الخميس ولقيت الغرفه مبخره والحرمه كاشخه ..ياني انتك ويصكني راسي.. لانه عارف هالمراسيم وش تعني؟؟ ..يعني كأنه داخل امتحان

فاصحي تكون حياتك كذا...خليك كل يوم مرتبه بدون تكلف وريحتك حلوه ..والبيت المفروض دايما ريحته حلوه ومبخر...ومافيه شيء روتيني...ولا تحددين ايام بالذات..كنه هوم وورك.. ..خلي الحياة بينكم تكون طبيعيه ومافيها تحدي او انتظار مبادره من الطرف الاخر...او امتحانات...او تخطيط مسبق ..روتيني..ممل..ومنفر مع مرور الوقت.. ..يعني موب يمر كل الاسبوع وانتي مشهبه..وحالتك حاله..واذا جا يوم الخميس..لبستي قميص اسود ولا احمر( مافيه غير هاللونين لو يموت ) وحطيتي روج وبخرتي الغرفه...والله شينه ..يعني..اذا في امك خير نم

ولا تظنين ان الرجل تكسبينه بالجنس فقط..وتحطين حيلك في القمصان..والعطور والكريمات..صدقيني..كل شيء بعدين بيصير عادي وغير مبهر ..مع الاعتياد والتكرار

اهم شيء تكسبين صداقة زوجك..وتبانين عنده بفكر نير..وادراك واسع..وروح مرحه...وملافظ تفتح النفس .ونفس خفيفه...وتفهم واحتواء له في كل حالاته..هذا اللي يولع الزوج بزوجته..ويجعله مايستغني عنها...

واهم شيء..تختارين الوقت المناسب...يعني موب تشوفينه توه داخل البيت من الدوام..ناشفة براطمه. .وتقعدين تطلبين منه شيء..او تقولين له خبر موب زين..او تشكين عليه اهله او امه...او بزارينه..ولا تقولين..ترى الغاز قضى..ولا الثلاجه فاضيه....ولا الشغاله زعلانه وصاكه على روحها في الغرفه موب وقته يا بنت الناس.... ...لانه لو ساعتها يصكك باقرب شيء عنده ما ينلام فيك
يعني قدري انه تعبان ..وجوعان..اصبري الين ياكل وينام ويريح واذا صحى وجلس يشرب الشاهي..ابدي سولفي وقولي اللي تبينه

واعرفي ان كل شيء بوقته حلو..الدلع له وقت..والحب له وقت..والنقاش الجدي له وقت...
يعني لما تشوفينه رايق ..اتدلعي عليه. وطلعي مواهبك اللغويه في هالمجال .وسولفي..وعلقيّ عليه.وخلي القعده عياره...وتجاذبي معه اطراف الحديث في احداث المجتمع..واخر الاخبار...

.ولما تشوفينه مزهزه..وعيونه تلمع ..البسي لبس حلو..ومافي مانع ترقصين له...وتمارسين بعض انواع جنونك..اللي المفروض تنمينه في داخلك وتجددينه

طوري من ملكاتك ومواهبك..لاتقولين مثلا : ماعرف ارقص..اتعلمي واكسري اية حواجز بداخلك...ترى الرجل اية شيء يملا عينه من انسانه يحبها اذا هي تعطيه بحب واحساس صادق...واقتناع...بس ترقصين مثلا وانتي مستحيه ولانتي مقتنعه..اكيد بيحس فيك خجلانه .. ولاهو حاس انك حلوه ابدن البته الا بيرحمك ويمكن تطيحين من عينه ..ثقي بروحك وبنفسك واتصرفي على هالاساس بتصير كل حركاتك وسكناتك حلوه...وبتعجبه حتما .وعلى هذا قيسي كل شيء بيصير بينكم

لما تشوفينه مهموم ويفكر او مرهق..لا تحملينه مالايطيق ..حتى لو ليلة خميس ..ترى الرجل اذا كان مهموم او ضايق او مرهق..ماله خلقك حتى لو انك ملكة جمال...وانتي بعد نفس الشيء.. ..فحاولي تهيئين له جو الاسترخاء والراحه...وصدقيني الرجل يقدر المرأه الذكيه..الحساسه..اللي تعرف متى..وكيف واين ..

من اول ما تتزوجين..عاملي امه وابوه باحترام وتقدير...خصوصا امه..ترى الرجل حتى لو موذاك الزود من البر باهله او عدم الاهتمام..يقدر المرأه اللي تقدر امه وابوه...وتغلا عنده زود... .وانصحك لا تدعّين الحبابه او تتكلفين في معاملتك لاهله عشان تكسبين ودهم..انما كوني على طبيعتك...لان هذا عمر...ولكن اكسبيهم بالمعروف..وقدري والدته جدن..واكرميها..بدون مذله لك او ضغط عليك...واعزميهم بين فتره والثانيه .عندك..واكرميهم..عشان ترضين خالقك ثم زوجك ..

لاتكثرين النقنقه عليه بتصرفات اخواته وامه او زوجات اخوانه..لان الحريم يا حبيبتي..اتوقعي منهم اية شيء..من غمزات ولمزات بالنظرات والحكي..او التصرفات غير المقبوله.. خاصه في بداية زواجك..فالمفروض ومن الحكمه انك تطنشينهم..ولاكأنك حاسه باللي يسوونه..ولا تنقلين لزوجك هالحكي التافه اللي يوغر الصدور ولامنه طائل. .مدامك في بيتك ومافي فوق راسك راس..ماعليك من احد...وهم مع الوقت..بيعرفون ان عقلك كبير وانك ماتنجرين وراء التوافه..وبيحسون من تصرفاتك اية انسانه انتي وبيقدرونك التقدير اللي تستحقينه..واذا ما حبوك..اقلها يهابونك ويحترمونك

مهما بلغت ثقتك بزوجك وحبك له..لا تدخلينه في مجال حياة اهلك وامورهم وتطلعينه على اخبار بيتكم..خاصه السلبيه منها..مثلا لو ينشأ خلاف في بيت اهلك بين اخوانك..او اية مشكله..لا تشركينه في الموضوع او تشكين له الحال...لانه مهما كان انسان غريب..وماله حق يطلع على خصوصية بيتكم..وكمان خليه دايم يشوف اهلك بعين الاحترام والهيبه..والمثاليه...لانه ممكن يمسكها عليك او يعايرك بها حتى لوكان مايقصد...او يخف احترامه لك ولاهلك...
ودايما اظهري له الوجه المشرق والجميل لاهلك واخوانك ...وانك بنت خير وعز ونعمه ..وبنت ناس محترمين..ومثاليين..قدر الامكان


وفي النهايه بقي اقولك:

شوي بشوي.. مع مرور الايام والعشره والولف والحب بتكسبين قلب زوجك..وحبه الحقيقي...وانشاء الله يعمر بيتكم بالاولاد والمحبه والموده...

لكمـ ما تبقى منـ الوود

أخوكمـ

خطير الملامح


( للمعلوميه الموضوع نقل كما هو )

[خالد الرشيد]

نقل رائع اخي الغالي

خطير الملامح

استمر نحو الابداع

وفقك الله وانار طريقكـ

[خطير الملامح]

أنت الرائع

اخي العزيز

خالد الرشيد

أشكرك على مرورك اللذي زاد ضياء موضوعي نورا

لك خالص الشكر

[غالية الأثمان]

سلم نقلك اخي الكريم .. خطير الملامح

موضوع مهم وفي مكانه ...

بس شدتني هذة السطور :

الليله الاولى:
====================

بعد ماتروحون الاوتيل..وتبدلين ملابسك..انصحك بلبس قميص محتشم..طويل...وبصراحه انصح كل عروسه يكون اسبوعها الاول بقمصان نوم تميل للاحتشام..ترى الرجل يظل يحترم في المرأه حياؤها..ومهما بلغ الرجل من تحضر او تفتح ذهن...يرضي غروره الذكوري ان المرأه تستحي منه...اضافه الى انه يحس بالاطمئنان لزوجته..اذا شافها على هالشكل...وحلو الشيء يجي بالتدريج..

من معرفتي العكس هو المطلوب وخاصة بزمننا ...

لاحياء دامه الزوج وبالحلال ..

دمت بخير .

[خطير الملامح]

العفو

اختي

غالية الأثمانـ

كمـ أسعدنيـ مروركـ

لكـِ خالص الشكر

[روح الإمارات]

تسلم أخووووووووي ع المعلومة

[حنيـــن]

السلام عليكم ورحمة الله وبركاته
مشكور أخوي خطير
وأنا في فترة خطوبة راح أستفيذ من هالموضوع كثير
وأن شاءالله يتمم على خير